لغة البرمجة Python

من المهندس Mahmoud Khalid:

ناس كتير بتقول ان البايثون لغة المستقبل وانها هتبقى اللغه رقم 1 فى العالم ! وده بسبب سهولتها وسرعة انتشارها واستخدامتها المتعددة 🚀 !

البايثون بتدخل فى مجالات كتير زى برمجة تطبيقات الويب 🌐 ، برمجة تطبيقات الـ Desktop 🖥️، برمجة الألعاب 🎮 ، برمجة الموبايل 📱 ، الى جانب استخدمها فى مجالات زى الذكاء الأصطناعى وصناعة الروبوتات ، الـ Ethical Hacking ، الـ Data Science والـ Machine Learning بالأضافه لاستخدامها فى مجال الشبكات.

ومن مميزات البايثون وجود Frameworks ومكتبات مختلفة هتساعدك تنفذ اى مشروع بتفكر فيه !

يعنى ممكن تستخدم فريمورك زى Flask او Django عشان تنفذ تطبيق ويب ، وتستخدم فريمورك زى PyQt او PySideعشان تنفذ تطبيق Desktop ، وتستخدم فريمورك زى Kivy او Qpython عشان تنفذ تطبيق موبايل يشتغل على الأندرويد والـ iOS ، او تستخدم فريمورك زى PyGames عشان تصمم ألعاب وهكذا.

ومن اشهر تطبيقات الويب اللى استخدمت البايثون كجزء من تصميمها هو Google و YouTube و Instgram و Quora والمشترك فى التطبيقات دى انهم كلهم قائمين على فكرة البحث سواء عن معلومات او فيديوهات او صور.

ومن اشهر تطبيقات الـ Desktop هو تطبيق BitTorrent وتطبيق Dropbox وتطبيق Cinema 4D ، واستخدمت البايثون كمان فى العاب زى Battlefield 2 و EVE Online و Toontown Online و Star Trek: Bridge Commander والعاب كتير غيرهم

وكل ده خلى البايثون تبقى رقم 3 فى قائمة لغات البرمجة الأكثر طلباً خلال 2018 ! وانت بنفسك لو عملت بحث عن وظائف الـPython فى مصر هتلاقى انها بتزيد كل يوم عن اليوم اللى قبله وهتلاقى ان مرتبات مبرمجين البايثون من اعلى المرتبات !

وبما ان البايثون واحده من اسهل لغات البرمجة وبدايتها مش معقده زى لغات برمجه تانيه ، وممكن تستخدمها فى اى حاجه تقريبا ! ليه متخليش البايثون رقم 1 فى قائمة اللغات اللى لازم تتعلمها السنه دى ؟